શાળાગીત

શિક્ષણ શાસ્ત્રી યશપાલજીના “ભાર વિનાનું ભણતર” સાથે એક નવું વિચારબીજ લઈને – પ્રદૂષણ મુક્ત શાળા અમે રચી છે. આ નવું વિચારબીજ એટલે ‘ભાર વિનાના ભણતર’ સાથે ‘બાળપણ સાચવતું ભણતર’.

બાળકની કલ્પનાની શાળા, બાળકની કલ્પનાઓને ઉજાગર કરવા મથતું શિક્ષણ. દીવાલો વગરની શાળાનું સ્વપ્ન, મુક્ત આકાશ નીચે હસતાં-રમતાં વાતો કરતાં અપાતું શિક્ષણ. બાળકોને સમજાય તેવી ભાષા, બાળકોને સમજાય તેવાં સાધનોથી અપાતું શિક્ષણ, પુસ્તકથી ઠલવાતી માહિતી નહીં પરંતુ વાત વાતમાં સહજ રીતે અપાતું શિક્ષણ. બાળકોને એમના કલ્પનાલોકમાં વિહરતાં રાખી અપાતું શિક્ષણ. કંઈક આવી વિચારધારાને કેન્દ્રમાં રાખી શાળાને ધબકતી કરવાનો અમારો પ્રયાસ છે.

પ્રદૂષણ મુક્ત શાળાના વાતાવરણ ઉપરાંત અહીં વર્ગખંડનું બંધિયાર વાતાવરણ નથી, પુસ્તકોનો ભાર નથી, દફતરની કડાકૂટ નથી. સ્વચ્છ નિર્મળ પર્યાવરણની વચ્ચે પ્રકૃતિના સાન્નિધ્યે પ્રાચીન ગુરુકુળના પરિવેશમાં જ બાળક પોતાના બાળપણના આનંદ સાથે સહજ રીતે ચેતોવિસ્તાર સાધે, એ અમારી કલ્પનાની શિક્ષણ વ્યવસ્થા છે. એ માટે અમે કલ્પનાશીલ શિક્ષણ પ્રવૃત્તિઓ પ્રયોજી છે.

શાળાનું ભવ્ય મકાન અમારું સ્વપ્ન નથી. પોપટની જેમ રટરટ કરતાં યાંત્રિક બાળકો અમારું સર્જન નથી. પરીક્ષાના ડરથી આત્મહત્યા કરવા પ્રેરાતા ડરપોક વિદ્યાર્થી અમારે ઘડવા નથી. બોર્ડમાં દસમું સ્થાન મેળવી જિંદગીમાં પાછો પડતો વિદ્યાર્થી અમારું ધ્યેય નથી. આ શાળામાં પ્રવેશ મેળવવા કતારો લાગે તેવી અમારી ઝંખના નથી.

અમારે “સ્વનિર્ભર” માનવી શાળામાંથી ઊભો કરવો છે. ગમે તેવાં સંકટો સાથે પાર પાડે તેવો વિદ્યાર્થી ઘડવો છે. પોતાની કલ્પનાનું જીવન ઘડી શકે તેવો પુરુષાર્થી અમારે ઊભો કરવો છે. માત્ર વિદ્યાસંપન્ન નહીં – ચારિત્ર્યસંપન્ન નાગરિક સમાજ અમારે ઊભો કરવો છે.

અમારા પુરુષાર્થયજ્ઞમાં આપનો સહયોગ મળશે એવી શ્રદ્ધા જાગે છે. આપ અમારી વિચારધારાને વેગ આપશો તેવો દ્રઢ વિશ્વાસ છે. અમારા પુરુષાર્થયજ્ઞમાં યત્કિંચિત આહુતિની અપેક્ષા અને આભાર સાથે, વધુ જાણવા અમારો સંપર્ક કરો.